(VOD) អាជ្ញាធរឃុំស្រែព្រះ ខេត្តមណ្ឌលគិរី នៅថ្ងៃសៅរ៍នេះ បានហាមឃាត់ក្រុមអ្នកសារព័ត៌មាន និងអង្គការសង្គមស៊ីវិល ចូលទៅមើលទីតាំងដែលប្រជាពលរដ្ឋអះអាងថា មានបទល្មើសព្រៃឈើធ្ងន់ធ្ងរ។
នៅរសៀលថ្ងៃសៅរ៍ ទៅ២៦ខែមេសា វេទិកានៃអង្គការមិនមែនរដ្ឋាភិបាលស្តីពីកម្ពុជា NGO Forum សហការជាមួយមជ្ឈមមណ្ឌលអប់រំច្បាប់សម្រាប់សហគមន៍ រួមទាំងអ្នកសារព័ត៌មានជាតិជាង១០នាក់ ត្រូវបានមេឃុំស្រែព្រះ ឈ្មោះព្យើប ពេ ហាមឃាត់មិនឲ្យចូលទៅក្នុងភូមិពូគង ដែលជាតំបន់ប្រជាពលរដ្ឋត្អូញតែ្អរថា មានបទល្មើសព្រៃឈើកើតឡើងជាបន្តបន្ទាប់ ដោយសារក្រុមហ៊ុនវៀតណាម។
ស្របពេលដែលក្រុមការងារចុះទៅដល់តំបន់នោះ មេឃុំស្រែព្រះ លោក ព្យើប ពេ មានប្រសាសន៍ទាំងទឹកមុខខឹងសម្បាថា ហាមមិនឲ្យក្រុមអង្គការ និងអ្នកសារព័ត៌មានស្នាក់នៅទីនោះទេ ព្រោះមិនមានលិខិតចេញពីថ្នាក់ខេត្ត ឬស្រុក ដោយលោកប្រើពាក្យគំរាមថា លោកនឹងមិនធានាសន្តិសុខសុវត្ថិភាពឡើយ។ ស្របពេលជាមួយគ្នានោះ អ្នកសារព័ត៌មានព្យាយាមសុំសម្ភាសន៍មេឃុំរូបនេះ ទាក់ទងនឹងបទល្មើសព្រៃឈើនៅតំបន់នោះ តែត្រូវបាន លោកបដិសេធធ្វើអធិប្បាយ ដោយគ្រាន់តែនិយាយថា លោកមិនដឹង។ បន្ទាប់ពីមិនអនុញ្ញាតឲ្យក្រុមសង្គមស៊ីវិល និងអ្នកសារព័ត៌មានស្នាក់នៅទីនោះ លោកបាននាំគ្នា និងនគរបាលម្នាក់ទៀតដែលមានកាន់កាំភ្លើងមកដើរឆ្វែលក្បែរៗនោះ។
លោក ខ្វែ យ៉ួម ដែលជាម្ចាស់ផ្ទះចង់ឲ្យក្រុមអង្គការ និងអ្នកសារព័ត៌មានស្នាក់នៅ មិនយល់ស្របចំពោះទង្វើរបស់អាជ្ញាធរទេ។ លោកមានប្រសាសន៍ថា បច្ចុប្បន្នព្រៃឈើហិនហោចអស់ ដោយសារតែក្រុមហ៊ុនចុះទៅអភិវឌ្ឍ មិនមានការហាមឃាត់ពីអាជ្ញាធរ ឬរដ្ឋាភិបាល។
មន្ត្រីច្បាប់នៃអង្គការ NGO forum លោក វង្ស កុសល រិះគន់ចំណាត់ការរបស់អាជ្ញាធរ ដោយលោកបញ្ជាក់ថាការចូលមកស៊ើបអង្កេត ឬរកជនល្មើស មិនចាំបាច់ផ្តល់ដំណឹងទៅអាជ្ញាធរទេ ព្រោះខ្លាចបែកការណ៍ ជនល្មើសរត់បាត់អស់។
ទោះជាយ៉ាងណានៅថ្ងៃអាទិត្យនេះក្រុមការងារ និងអ្នកសារព័ត៌មាននឹងព្យាយាម ចូលទៅមើលតំបន់ដែលមានបទល្មើសព្រៃឈើនោះម្តងទៀត។
របាយការណ៍របស់វេទិកានៃអង្គការមិនមែនរដ្ឋាភិបាល ស្តីពីកម្ពុជា ( Ngo Forum) ឲ្យដឹងថា សកម្មភាពកាប់ព្រៃឈើធ្វើជាលក្ខណៈប្រព័ន្ធខ្លាំងបំផុត ចាប់តាំងពីឆ្នាំ២០១២ បន្តដល់បច្ចុប្បន្ន។ ប្រជាពលរដ្ឋមកពីខេត្តនានា មកកាប់ឈើលក់ឲ្យឈ្មួញកណ្តាល ហើយលក់បន្តឲ្យទៅឈ្មួញអ្នកមានអំណាចម្នាក់ ដឹកឈើទាំងនោះចូលទៅក្នុង ក្រុមហ៊ុនវៀតណាមឈ្មោះ ប៊ិញហឿក ក្រចេះ រ៉ាប់ប៊ឺ ១ (Benh pheud kratie rubber I company ) ដើម្បីបំលែងជាឈើស្របច្បាប់ មានអាជ្ញាប័ណ្ណត្រឹមត្រូវ និងចុងក្រោយដឹកចេញទៅលក់នៅទីផ្សារ៕
ព្រៃឈើដែលរកការកាប់បំផ្លាញ
