(Sabay News) តារាសម្ដែងតៃវ៉ាន់ Barbie Hsu ដែលជាតួសានឆាយ ក្នុងរឿង F4 តៃវ៉ាន់ សម្រាលបានកូនស្រីម្នាក់ហើយ ដោយការវះកាត់ នៅមន្ទីរពេទ្យមួយក្នុងទីក្រុងតៃប៉ិ កាលពីថ្ងៃព្រហស្បតិ៍។
Hsu បានសម្រាលកូនស្ងាត់ៗដោយមិនមានសារព័ត៌មានណាមួយបានដឹងឡើយ រហូតដល់នាងបង្ហោះរូបកូននាង លើប្លុករបស់នាងទើបគេបានដឹងគ្រប់គ្នា។ ជាមួយរូបថតនេះ Hsu បានសរសេរថា “នាងកើតហើយ … កូនស្រីខ្ញុំសុខភាពល្អណាស់”។
នៅថ្ងៃសុក្រនេះ នាងក៏បានបង្ហោះរូបថតដ៏ផ្អែមល្ហែមជាមួយកូនស្រី និងស្វាមីរបស់នាង ដែលជាអ្នកជំនួញមានទ្រព្យស្ដុកស្ដម្ភ Wang Xiao Fei។
តារាវ័យ ៣៧ឆ្នាំរូបនេះ មិនទាន់បង្ហើបឈ្មោះកូនស្រីនៅឡើយទេ។ នេះគឺជាកូនដំបូងហើយ របស់គូស្វាមីភរិយាមួយគូនេះ បន្ទាប់ពីពួកគេបានរៀបអាពាហ៍ពិពាហ៍តាំងពីឆ្នាំ ២០១១ ៕
