ភ្នំពេញ៖ក្រសួងអប់រំយុវជននិងកីឡាបានឲ្យដឹងថា រដ្ឋាភិបាលសហព័ន្ធរុស្សីបានផ្តល់អាហារូបករណ៍ចំនួន១៨កន្លែងដល់សិស្ស និស្សិត មន្ត្រីរាជការនៃព្រះរាជាណាចក្រកម្ពុជាឲ្យទៅបន្តការសិក្សា ថ្នាក់ បរិញ្ញាបត្រ បរិញ្ញាបត្រជាន់ខ្ពស់និងថ្នាក់អនុបណ្ឌិតនៅសហព័ន្ធរុស្សីក្នុងឆ្នាំសិក្សា២០១៤-២០១៥។
យោងតាមសេចក្តីជួនដំណឹងរបស់ក្រសួងអប់រំយុវជននិងកីឡាបានឲ្យដឹងថា អាហារូបករណ៍នោះភាគីរុស្សីជាអ្នកចេញថ្លៃការសិក្សារីឯសំបុត្រយន្តហោះពីភ្នំពេញទៅម៉ូស្គូរាជរដ្ឋាភិបាលកម្ពុជាជាអ្នកចេញចំណែកឯសបុត្រយន្តហោះពីម៉ូស្គូមកភ្នំពេញជាបន្ទុករបស់សាមីខ្លួន ។ ក្រៅពីនេះនិស្សិតត្រូវមានប្រាក់សំរាប់ចំណាយបន្ថែមដូចជា១៥០ដុល្លារសំរាប់ធ្វើដំណើរពីម៉ូស្គូទៅកន្លែងសិក្សា។ត្រូវមានប្រាក់ផ្ទាល់ខ្លួនសំរាប់ផ្គត់ផ្គង់ជីវភាពប្រចាំថ្ងៃនិងប្រាក់២៥០ដុល្លាសំរាប់ធានាសុខភាពក្នុង១ឆ្នាំ។
លោកស៊ែហ្កីកូឡេសូហ្វនាយកមជ្ឈមណ្ឌលវិទ្យាសាស្ត្រនិងវប្បធម៌រុស្ស៊ីធ្លាប់បានមានប្រសាសន៍ថា រដ្ឋាភិបាលរុស្សីបានចាប់ផ្តើមផ្តល់អាហារូបករណ៍ដល់និស្សិតកម្ពុជាចាប់តាំងពីឆ្នាំ១៩៨០ រហូតដល់ឆ្នាំ១៩៩៣បានផ្អាកហើយរហូតដល់ឆ្នាំ១៩៩៨បានផ្តល់ឡើងវិញ។ កាលពីអំឡុងឆ្នាំ១៩៨០ដល់ឆ្នាំ១៩៩៣ក្នុងមួយឆ្នាំៗរុស្សីបានផ្តល់អាហារូបករណ៍ដល់និស្សិតកម្ពុជាចំនួន១០០នាក់តែចាប់ពីឆ្នាំ១៩៩៨មកដល់បច្ចុប្បន្ននេះបានកាត់បន្ថយនៅសល់តែ២៥នាក់ប៉ុណ្ណោះក្នុង១ឆ្នាំ។
លោកបានបន្តថា ចាប់តាំងពីឆ្នាំ១៩៨០រហូតមកដល់សព្វថ្ងៃនេះមាននិស្សិតកម្ពុជាប្រមាណជិត៧ពាន់នាក់ហើយបានបញ្ចប់ការសិក្សាពីប្រទេសរុស្សី។ លោកស៊ែហ្កីកូឡេសូហ្វបានបន្ថែមថា និស្សិតដែលទៅសិក្សានៅប្រទេសរុស្សីរៀនលើមុខវិជ្ជាមួយចំនួនដូចជាផ្នែកសំណង់ស៊ីវិល ស្ថាបត្យកម្ម គីមីចំណីអាហារ ពេទ្យនិងមេកានិច។
លោកឡាក់ណារ៉ាន់ដែលត្រូវទៅបន្តការសិក្សានៅប្រទេសរុស្សីនាពេលខាងមុខនេះបានមានប្រសាសន៍ថាការទៅសិក្សានៅប្រទេសរុស្សីនេះខាងរដ្ឋាភិបាលរុស្សីចេញថ្លៃសាលាការស្នាក់នៅឧបត្ថម្ភក្នុង១ខែ៤០ដុល្លាអាមេរិក។រីឯការហូបចុកនិងបង់ថ្លៃសុខភាពខាងនិស្សិតយើងជាអ្នកចេញដោយខ្លួនឯង។ ក្រៅពីនេះខាងរាជរដ្ឋាភិបាលកម្ពុជាបានជួយចេញក្នុង១ខែចំនួន១០ដុល្លាអាមេរិកផងដែរ។ លោកបានបន្តថា និស្សិតដែលទៅរៀននៅប្រទេសរុស្សីត្រូវចំណាយក្នុង១ខែទៅលើការហូបចុកប្រមាណ១០០ទៅ២០០ដុល្លានិងបង់ទៅលើថ្ងៃសុខភាពពី២០០ទៅ៣០០ដុល្លាទៅតាមទីកន្លែងនីមួយ៕
អត្ថបទ៖សំអឿន
ប្រភព៖ Bayon TV
