យន្តហោះមួយបង្ខំចុះចតនៅកោះបាលីព្រោះអ្នកជិះប្រមឹកម្នាក់
(កោះសន្តិភាព) បុរសប្រមឹកម្នាក់ បានប៉ុនប៉ងចូលក្នុងបន្ទប់បើកបរនៃយន្តហោះមួយគ្រឿងរបស់ក្រុមហ៊ុនអាកាសចរណ៍អូស្ត្រាលី Virgin Australia កាលពីថ្ងៃទី២៥ មេសា បង្ខំឱ្យយន្តហោះនោះចុះនៅកោះបាលី ។ អាជ្ញាធរឥណ្ឌូណេស៊ី ដំបូងលើកឡើងពីការប៉ុនប៉ងចាប់ពង្វាងយន្តហោះ ។
ហោះមកពីទីក្រុង Brisbane យន្តហោះជើងហោះហើរ VA41 របស់ក្រុមហ៊ុននោះបានបង្ខំចុះចតបន្ទាន់នៅកោះបាលី ។ អ្នកដំណើរម្នាក់ប៉ុនប៉ងលុកចូលបន្ទប់អ្នកបើកបរ ។ អ្នកបើកបង្ខំចិត្តចុះចតបន្ទាន់ ហើយចុះនៅព្រលានយន្តហោះ Denpasar ប៉ុន្មាននាទីមុនពេលដល់ម៉ោងចុះ ។ ពេលមានការប្រកាសអាសន្ន អ្នកដំណើរនោះត្រូវប៉ូលិសចាប់ខ្លួនភ្លាមៗ ។
អាជ្ញាធរឥណ្ឌូណេស៊ី ភ្លាមៗប្រាប់សារព័ត៌មានថា នោះជាការប៉ុនប៉ងចាប់ពង្វាងយន្តហោះ តែប្រមាណ២០នាទីក្រោយមក ក្រុមហ៊ុនអាកាសចរណ៍ Virgin Australia បានបដិសេធការបកស្រាយនោះ ដោយនិយាយថាអ្នកដំណើរម្នាក់ប៉ុនប៉ងចូលក្នុងបន្ទប់បើកបរ ប៉ុន្តែពុំមែនក្នុងបំណងចាប់ពង្វាងយន្តហោះទេ ។ តាមពិតបុរសនោះជាអ្នកស្រវឹងស្រា ៕
