ក្រុមហ៊ុន GeoResonance បាននិយាយកាលពីថ្ងៃចន្ទថា បំណែកយន្តហោះជាច្រើនត្រូវបានប្រទះឃើញក្នុងឆកសមុទ្របេងហ្គាល់ ដែលមានចម្ងាយ ៥ ពាន់គីឡូម៉ែត្រពីកន្លែងដែលកំពុងស្វែងរកបច្ចុប្បន្នក្នុងមហាសមុទ្រឥណ្ឌា ដោយលើកឡើងថា ក្រុមហ៊ុននេះបានចាប់ផ្ដើមធ្វើការរុករកដោយខ្លួនឯងតាំងពីថ្ងៃទី ១០ មិនាមក។
អគ្គនាយកអាកាសចរណ៍ស៊ីវិលម៉ាឡេស៊ីលោក Datuk Azhauddin Abdul Rahman និយាយប្រាប់សារព័ត៌មាន The Star ថា ខាងម៉ាឡេស៊ីមិនទាន់បានទទួលរបាយការណ៍ពីការរកឃើញនេះនៅឡើយទេ។ លោកបញ្ជាក់ដូច្នេះ “យើងនឹងធ្វើការពិនិត្យ និងផ្ទៀងផ្ទាត់ទៅលើរបាយការណ៍នេះ”។
ក្រុមហ៊ុនរុករកដែលមានមូលដ្ឋានក្នុងទីក្រុង Adelaide លើកឡើងថា ខ្លួនបានធ្វើការរុករកលើផ្ទៃដីទំហំ ២ លានគីឡូម៉ែត្រការ៉េដែលយន្តហោះម៉ាឡេស៊ីអាចធ្លាក់។ ការរុករករបស់ពួកគេផ្អែកទៅលើរូបភាពដែលទទួលបានពីផ្កាយរណប និងយន្តហោះ ខណៈដែលអ្នកវិទ្យាសាស្ត្ររបស់ពួកគេផ្ដោតការរុករកទៅភាគខាងជើងពីកន្លែងដែលជើងហោះហើរ MH370 បាត់ចេញពីដាន។ “បច្ចេកវិទ្យាដែលយើងប្រើគឺ ដើមឡើយត្រូវបានបង្កើតឡើងសម្រាប់ស្វែងរកក្បាលគ្រាប់ និងនាវាមុជទឹកទេ។ តែក្រុមរបស់យើងក្នុងប្រទេសអ៊ុយក្រែនបានសម្រេចចិត្តថា យើងត្រូវតែសាកល្បង ជួយដល់កិច្ចការនេះ”។ នេះជាសម្ដីរបស់អ្នកនាំពាក្យក្រុមហ៊ុនលោក David Pope។ ក្រុមហ៊ុនដដែលបានប្រើប្រាស់បច្ចេកវិទ្យាជាង ២០ ដើម្បីវិភាគទិន្នន័យដោយក្នុងនោះរួមមានទាំងការប្រើប្រាស់រ៉េអាក់ទ័រនុយក្លេអ៊ែរមួយផងដែរ។ ការអះអាងរបស់របស់ក្រុមហ៊ុន GeoResonance កើតឡើងក្រោយពេលអ្នកនាំពាក្យម្នាក់ទៀតគឺលោក Pavel Kursa អះអាងថា បានប្រទះឃើញបំណែកមួយចំនួននៅឆកសមុទ្របេងហ្គាល់ ដោយបំណែកទាំងនោះមានសារធាតុអាលុយមីញ៉ូម ទីតានីញ៉ូម ទង់ដែង លោហៈដែក និងសារធាតុផ្សេងទៀតសម្រាប់ផលិតយន្តហោះ Boeing 777៕ (Sabay)
