នាង Elisany da cruz Silva អាយុ១៧ឆ្នាំ ជនជាតិប្រេសីុល មានកម្ពស់ ២,០៣ម៉ែត្រ ចំណែកប្រុសស្នេហ៍របស់នាង Francinaldo da Silva Carvalho មានកម្ពស់ត្រឹមតែ១,៦៤ម៉ែត្រប៉ុណ្ណោះ ។ សេ្នហារបស់នាង Elisany ធ្វើឱ្យបុរសជាងសំណង់អាយុ២២ឆ្នាំរូបនេះមានអារម្មណ៍ដូចបានដុះស្លាបហើរឡើងលើគ្រប់ពេល ។ ជានិច្ចកាលពេលថើបគ្នា ម្តងៗ ខាងប្រុសប្រឹងជំទើតជើង ដក.ក ឯនាងសង្សារអោនចុះហុចថ្ពាល់ ព្រមទាំងសើច តិចៗយ៉ាងមានសេចក្តីសុខ ។
នាង Elisany មានភាពងាយស្រួលយករបស់អ្វីនៅទីខ្ពស់ហុចឱ្យប្រុសស្នេហ៍ ប្រសិនបើគ្មាននាងជួយទេប្រុសស្នេហ៍ត្រូវឡើងឈរលើកៅអីទើបយកបាន ។ Francinaldo និយាយថា គេស្រលាញ់ទឹកមុខនាង Elisany ណាស់ ។ ទឹកមុខនាងពេលណាក៏ឃើញតែញញឹមពព្រាយគួរឱ្យគ្រឺតមែនទែន ។ មនុស្សច្រើនគ្នាចំអកថា រូបគេស្រឡាញ់ហ្សុីរ៉ាហ្វ (girafe) កវែងអើតដល់ចុងឈើ តែគេអត់ខ្វល់ទេ, ហ្សុីរា៉ហ្វនេះញញឹមស្រស់ណាស់ ឱ្យតែនាងព្រមឆ្លើយតបស្នេហាគឺគ្រប់គ្រាន់ហើយ ។
ចំណែកនាង Elisany វិញ និយាយថា «ខ្ញុំស្រឡាញ់ Francinaldo ព្រោះគេមានចរិតល្អណាស់ រួសរាយជាមួយមនុស្សគ្រប់គ្នា ។ ពេលយើងកាន់ដៃគ្នាដើរលេងអ្នកផងពិតជាមានអារម្មណ៍ថាខ្ញុំកំពុងកាន់ដៃប្អូនប្រុស ព្រោះមើលទៅកម្ពស់ខុសគ្នាឆ្ងាយពេក ប៉ុន្តែខ្ញុំមិនខ្វល់ទេ ឱ្យតែយើងស្រឡាញ់គ្នាដោយស្មោះទៅបានហើយ។ មិនមែនខ្ញុំជ្រើសយកគាត់ឯណា គឺព្រះជាម្ចាស់ជ្រើសគាត់ឱ្យខ្ញុំ ។ ដូច្នេះខ្ញុំត្រូវតែស្រឡាញ់គាត់» ។
នាង Elisany រស់នៅទីប្រជុំជន Salinopolis ។ នាងខ្ពស់លលៃ ព្រោះមានដុំពកក្នុងខ្លួន ។ កាលអាយុ១៤ឆ្នាំ នាងមានកម្ពស់រហូតដល់២,០៥ម៉ែត្រឯណោះ ។ ការលូតលាស់ឆាប់បែបនេះ ធ្វើឱ្យអវយវៈនិងសន្លាក់ឆ្អឹងនានារបស់នាងតែងតែមានការចុកចាប់ ។ កាលពីពីរឆ្នាំមុន គ្រួសារនាងសុំវេជ្ជបណ្ឌិតកាត់ដុំពកក្នុងខ្លួនចោលទើបរាងកាយនាងថយកម្ពស់បាន២សង្ទីម៉ែត្រមកនៅត្រឹម២,០៣ម៉ែត្រវិញរហូតដល់សព្វថ្ងៃ ។ នាងមិនអាចជិះឡានរួមទៅសាលារៀនបានទេ ព្រោះខ្មាសមិត្តភក្តិជាសិស្សដូចគ្នាចេះតែសើចចំអក ។ នាងឈប់រៀនដើម្បីសម្រេចបំណងធ្វើនារីបង្ហាញម៉ូដវិញ ។
គេមិនត្រូវការបងខ្ពស់ពេកតែអូនត្រូវការ
នាឱកាសទិវានៃសេចក្តីស្រឡាញ់២៤ កុម្ភៈ ២០១៤ កន្លងទៅនេះ យុវជន វ៉ាង គៀង អាយុ៣១ឆ្នាំ ជនជាតិចិនទើបរកបានគូស្នេហ៍ប្រចាំជីវិតរបស់ខ្លួន ក្នុងពេលនាងក្រមុំទៅរកនាយដល់កន្លែងដោយខ្លួនឯង បន្ទាប់ពីនាងអានកាសែតឃើញសេចក្តីប្រកាសចង់រកគូគាប់របស់នាយ ហើយនឹកអាណិតនាយពេក ។ ដោយសារមានកម្ពស់រហូតដល់២,២៦ម៉ែត្រ ថែមទាំងខូចភ្នែកម្ខាងផង ហើយក្រីក្រទៀត វា៉ង គៀង ពីយូរមកហើយសុំស្នេហ៍ស្រីណាក៏ត្រូវនាងបដិសេធថាខ្ពស់អីខ្ពស់យ៉ាងនេះមិនហ៊ានយកទេ ។
វ៉ាង គៀង ដុះដុំពកក្នុងក្បាលធ្វើឱ្យរូបគេលូតកម្ពស់អត់ឈប់ឈរដោយមួយឆ្នាំលូតថែម៣ទៅ៤សង្ទីម៉ែត្រ ។ គេទើបតែឈប់លូតកម្ពស់កាលពីឆ្នាំ២០១២ ក្រោយវេជ្ជបណ្ឌិតនៅប៉េកាំងកាត់ដុំពកនោះចោល ។ សព្វថ្ងៃ វា៉ង គៀង ធ្វើការនៅមណ្ឌលកម្សាន្តមួយ ដោយ មួយថ្ងៃៗគេឱ្យស្លៀកពាក់ដើរតួទេវតាផ្តល់សំណាងក្នុងរឿងព្រេងចិន ដើម្បីឱ្យពួកភ្ញៀវចូលកម្សាន្តក្នុងមណ្ឌលនោះមានឱកាសសើចសប្បាយលំហែអារម្មណ៍ ។
ចំណែកមិត្តស្រីរបស់វ៉ាង គៀង ឈ្មោះ ចេន ហុង អាយុ២០ឆ្នាំ មានកម្ពស់១,៥៦ម៉ែត្រប៉ុណ្ណោះ ។ ពេលជួបគ្នាអ្នកទាំងពីរនិយាយចុះសម្រុងគ្នាណាស់ ហើយក៏ក្លាយជាគូស្នេហ៍ ភ្លាមៗក្នុងពេលនោះតែម្តង ។
កន្លែង វ៉ាង គៀង ធ្វើការប្រកាសចេញប្រាក់ជួយចាត់ចែងពិធីរៀបអាពាហ៍ពិពាហ៍ឱ្យបុគ្គលិករបស់ខ្លួនម្នាក់នេះទាំងស្រុង ប្រសិនបើអ្នកទាំងពីរសម្រេចចិត្តយកគ្នាជាប្តីប្រពន្ធ ។ នៅកន្លែងនោះគ្មានអ្នកណាមិនជួយត្រេកអរ វា៉ង គៀងដែលអាចរកបានគូស្នេហ៍ឡើយ៕
ប្រភព៖ កោះសន្តិភាព
