និស្សិតខ្មែរសាកលវិទ្យាល័យ Norton ទទួលបានជ័យលាភីទី 3 ក្នុងការប្រកួតប្រជែងមនុស្សយន្តវិទ្យាសាស្ត្រ ~ Moha Khmer

នេះមិនមែនជារឿងធម្មតានោះទេនៅពេលនិស្សិតខ្មែរតំណាងអោយប្រទេសកម្ពុជាទាំងមូលទទួលបានជោគជ័យយ៉ាងធំធេងមកជូនជាតិមាតុភូមិ ក៏ដូចជាលើកមុខមាត់ប្រទេសយើងអោយឈរនៅក្នុងលំដាប់អន្តរជាតិ ក្នុងវិស័យបច្ចេកវិទ្យា។ សម្រាប់យើងទាំងអស់គ្នាក្នុងនាមជាប្រជាជនខ្មែរទាំងអស់ ពិតជាកោតសរសើរនិស្សិតសកលវិទ្យាល័យ Norton ខ្លាំងណាស់ ដែលបានខិតខំប្រឹងប្រែងយ៉ាងស្វាហាប់ក្នុងការច្នៃប្រឌិតមនុស្សយន្តដ៏ពិសេសមួយជួយជាជំនួយក្នុងការពន្លត់អាគ្គីភ័យដោយយើងរពឹងទុកថា នាថ្ងៃអនាគតសកម្មភាពពន្លត់អគ្គីភ័យក្នុងប្រទេសយើងនឹងមានការរីកចំរើនខ្លាំង ដោយសារតែវិស័យបច្ចេកវិទ្យាកាន់តែទំនើបឡើងៗ។ មនុស្សយន្តពន្លត់អគ្គីសភ័យរបស់ក្រុមនិស្សិតខ្មែរនោះគឺត្រូវបានយកទៅប្រកួតប្រជែងនៅឯប្រទេសម៉ាឡេស៊ីកាលពីថ្ងៃទី 11 ដល់ 13 ខែមេសាកន្លងទៅក្នុងកម្មវិធី Malaysian International Robot Competitions ឬហៅកាត់ថា MIRoC ហើយពួកគេត្រូវបានជាប់ក្នុងចំណាត់ថ្នាក់លេខ 3 ក្នុងការប្រកួតមនុស្សយន្ត ដែលមានគូប្រជែង 19 សកលវិទ្យាល័យទៀតមកពីប្រទេសផ្សេងៗ។ មនុស្សយន្តនោះត្រូវបានគេហៅថា The Fire Fighting Robot ដែលត្រូវបានរចនា និងបង្កើតឡើងអោយមានសមត្ថភាពពិសេសអាចទៅមុខទៅក្រោយ បត់ឆ្វេងស្ដាំបាន ទៅតាមកាលៈទេសៈ ដើម្បីជួយសង្គ្រោះជនរងគ្រោះ (គ្រាប់ប៉េងប៉ុង) ក្នុងអាគារអគ្គីភ័យ ក៏ដូចជាពន្លត់ភ្លើង (ទៀន) ដែលកំពុងឆេះដ៏សន្ធោសន្ធៅផងដែរ។

តែដើម្បីអោយមនុស្សយន្តនោះអាចមានសមត្ថភាពដូចនេះបានគឺ ក្នុងតួម៉ាស៊ីនរបស់វាត្រូវបានបំពាក់មកជាមួយខ្សែភ្លើងមានមុខងារផ្សេងៗគ្នាជាច្រើន ដើម្បីបញ្ជាទៅគ្រាប់ឌីណាម៉ូសម្រាប់ប្រមូលគ្រាប់បាល់ប៉េងប៉ុង និងផ្នែកខាងលើត្រូវបានបំពាក់មកជាមួយនឹងកង្ហាសម្រាប់ពន្លត់ភ្លើងទៀន ដែលអ្នកនឹងឃើញនៅក្នុងវីដេអូខាងក្រោម។ មនុស្សយន្តនោះមានទម្ងន់ស្រាលត្រឹមតែ 1.5 គីឡូក្រាម កម្ពស់ 250មម និងទំហំព័ទ្ធជុំវិញ 130មម ប៉ុណ្ណោះ ហើយក្ដីរំពឹងរបស់មនុស្សយន្តនោះគឺអាចទាមទារច្រើនឆ្នាំទៅមុខទៀតដើម្បីអាចអោយវាមានសមត្ថភាពពិសេសអាចធ្វើការជំនួសអ្នកពន្លត់អគ្គីភ័យនៅប្រទេសកម្ពុជាយើងបាន។ យ៉ាងណាក្ដីយើងពិតជាមានមទនភាពខ្លាំងណាស់សម្រាប់ជ័យលាភីដែលក្រុមនិស្សិត Norton ទទួលបានកាលពីពេលថ្មីកន្លងទៅ ហើយក៏សង្ឃឹមយ៉ាងមុតមាំទៀតថាពួកគាត់នឹងខិតខំប្រឹងប្រែងបន្ថែមទៀតធ្វើយ៉ាងណាអោយមនុស្សយន្តរបស់គាត់កាន់តែមានសមត្ថភាព និងអស្ចារ្យថែមមួយកំរិតទៀតនាពេលអនាគត។ សូមទស្សនាវីដេអូមនុស្សយន្តរបស់និស្សិតខ្មែរដូចខាងក្រោម៖