រាជធានីភ្នំពេញ ៖ នៅទីបំផុតរោគាព្យាធិបានផ្តាច់សង្ខារតារាកំប្លែង និងអ្នកអាយ៉ៃ លោកយាយខ្លី ដែលមានឈ្មោះពិត នេត្រ ផល្លី ឱ្យលាចាកលោកទៅហើយ កាលពីវេលាម៉ោង១២ និង១២នាទីរំលងអធ្រាត្រ ឈានចូលថ្ងៃទី២ ឧសភា ២០១៤ នៅមន្ទីរពេទ្យកាល់ម៉ែត។
ដោយសារតែមានភាពទីទ័លក្រក្នុងជីវិតក្រុមគ្រួសារ កូនចៅយាយខ្លីបានធ្វើការអំពាវនាវសាជាថ្មីដល់សប្បុរសជននានា និងមិត្តអ្នកសិល្បៈគ្រប់មជ្ឈដ្ឋានដែលអាណិតស្រលាញ់ការសម្តែងរបស់លោកយាយ មេត្តាជួយឧបត្ថម្ភជាបន្តទៀតសម្រាប់ចាត់ចែងពិធីបុណ្យសពលោកយាយដែលត្រូវតម្កល់រយៈពេលបីថ្ងៃពេញនៅវត្តញានរង្សី ស្ថិតនៅម្តុំអង់តែនទួលគោក។ លោកយាយខ្លីមានវ័យ៦៥ឆ្នាំបានចូលសម្រាកព្យាបាលនៅមន្ទីរពេទ្យកាល់ម៉ែតប្រមាណជាងបីសប្តាហ៍មកហើយដោយទើបតែធ្លាក់ខ្លួនឈឺខ្លាំងបាត់មាត់បាត់.កនៅថ្ងៃទី២៧ មេសា កន្លងទៅ ដោយគាត់បឺតទុយោបន្តក់អត់បានទេទាល់តែបន្តក់មួយៗទើបបាន។
លោកយាយខ្លីមានជំងឺពុកឆ្អឹងចង្កេះ ទឹកនោមផ្អែម ឡើងជាតិស្ករនិងពេលកំពុងតែសម្រាកព្យាបាលពេទ្យរកឃើញមុខសញ្ញាជំងឺថ្មីមួយទៀត គឺរបេងឆ្អឹងដែលបានវាយលុកអាការជំងឺលោកយាយកាន់តែទ្រុឌទ្រោមទ្វេឡើង។ ដោយសារតែអស់លទ្ធភាពក្រោមកិច្ចខិតខំពីសំណាក់លោកគ្រូពេទ្យនៅកាល់ម៉ែតបានយកចិត្តទុកដាក់ព្យាបាលតាមដានជាប្រចាំយ៉ាងណាក៍មិនអាចប្រឆាំងនឹងជំងឺទាំងនោះបានឡើយ។
ទីបំផុតលោកយាយខ្លីត្រូវអស់អាយុសង្ខារនៅវេលាម៉ោង១២ និង១២នាទីឈានចូលថ្ងៃទី២ ឧសភា ដោយបានបន្សល់ទុកនៅក្តីអាឡោះអាឡ័យពីកូនចៅ និងភាពសោកស្តាយរបស់ប្រិយមិត្តដែលតែងតែជក់ចិត្តដិតអារម្មណ៍ចំពោះការសម្តែងរបស់គាត់ពេលមានជីវិត បើទោះជាមានពេលខ្លះសុខភាពរបស់គាត់មិនសូវរឹងមាំក៍ដោយ។ ជុំវិញមរណភាពតារាកំប្លែងជើងចាស់ដែលមានទេពកោសល្យ និងជាគម្រូសម្រាប់អ្នកជំនាន់ក្រោយអ្នកស្រីញ៉ែម សារុំ ជាកូនស្រីបង្កើតរបស់លោកយាយខ្លីបានឲ្យដឹងថា សពរបស់ម្តាយអ្នកស្រី នឹងតម្កល់ទុកធ្វើបុណ្យតាមប្រពៃណីរយៈពេលបីថ្ងៃចាប់ពីថ្ងៃសុក្រ ទី២ ឧសភា ដល់ថ្ងៃអាទិត្យ ទី៤ នៅក្នុងបរិវេណវត្តញានរង្សី ក្បែរអង់តែនទួលគោក ស្ថិតក្នុងសង្កាត់ទួលសង្កែ រាជធានីភ្នំពេញ ។ សពលោកយាយខ្លីនឹងរៀបចំពិធីបូជាបែបមេរុ នៅព្រឹកថ្ងៃអាទិត្យ ទី៤ ឧសភា វេលាម៉ោង៨ព្រឹកនេះ ។ បើតាមការអះអាងពីលោកតាអាចារ្យ។
កូនស្រីយាយខ្លីបន្តទៀតថា កុំតែបានពេទ្យជួយទេកុំអីពួកយើងជាកូនចៅគ្មានថវិកាឯណាចេញថ្លៃព្យាបាលនោះឡើយ បើពួកយើងម្នាក់ៗរងស៊ីបានតែរស់មួយថ្ងៃៗប៉ុណ្ណោះបានតែកម្លាំងចាត់ចែងជួយកំដរគាត់ប៉ុណ្ណោះ។ អ្នកស្រីសូមថ្លែងអំណរគុណដល់លោកគ្រូពេទ្យទាំងអស់នៅកាល់ម៉ែតដែលផ្តល់ក្តីអាណិតដល់ម្តាយអ្នកស្រីជួយព្យាបាលដោយឲ្យថ្នាំពូកែៗ ថ្លៃៗសម្រួលការឈឺចុកចាប់ និងជួយសង្រ្គោះរហូតមក ជាពិសេសសប្បុរជនទាំងអស់ដែលខ្លះសួរសុខទុក្ខតាមទូរស័ព្ទ ខ្លះមកដល់មន្ទីរពេទ្យជួយជាសម្ភារ និងថវិកាដើម្បីបានដោះទាល់ភាពលំបាក។ ទោះជាយ៉ាងណាតាំងនាមខ្ញុំជាកូនស្រីតំណាងឲ្យបងប្អូនញាតិមិត្តទាំងអស់នៃសពលោកយាយខ្លីសូមអំពាវនាវដល់សប្បុរជនទាំងអស់ទាំងអ្នកសិល្បករគ្រប់ជំនាន់ដែលអាណិតស្រលាញ់លោកយាយខ្លីសូមមេត្តាជួយឧបត្ថម្ភកម្មវិធីបុណ្យសពលោកយាយខ្លីរយៈពេលបីថ្ងៃនេះបានដំណើរការបានរលូនតទៅទៀតព្រោះកូនចៅនៅតែគ្មានលទ្ធភាពចាត់ចែងបុណ្យបានគ្រប់ជ្រុងជ្រោយប៉ុន្មានទេ ដោយក្នុងមួយថ្ងៃៗយើងចំណាយច្រើនគួរសមសម្រាប់កម្មវិធីផ្សេងៗ ម្ហូបអាហារ និងថ្លៃធ្វើមេរុបូជាសពម្តាយ។ ម្តាយអ្នកស្រីនឹងធ្វើបុណ្យគម្រប់៧ថ្ងៃនៅខេត្តព្រៃវែងដោយសារតែទីនោះមានញាតិមិត្ត និងមានធាតុបងប្អូនក្នុងវត្ត ណាមួយយើងមានផ្ទះសម្បែងងាយស្រួលធ្វើបុណ្យជូនកុសលដល់គាត់។
ទាំងនេះជាសេចក្តីជូនដំណឹងជាមុនសម្រាប់មហាជនហើយបងប្អូនទាំងអស់អាចមកចូលរួមបុណ្យសពលោកយាយបាននៅទីតាំងដែលជម្រាបជូនខាងលើ ។ អ្នកស្រីនេត្រ ផល្លីហៅយាយខ្លីមានកូន៦នាក់ ក្នុងនោះប្រុស២នាក់ តែបច្ចុប្បន្ននៅសល់តែ៥នាក់ បន្ទាប់ពីកូនស្រីពៅបានស្លាប់កាលពីប៉ុន្មានឆ្នាំមុន។ លោកយាយខ្លីជាអ្នកសិល្បៈអាយ៉ៃជើងចាស់មុនចាប់អាជីពកំប្លែង។ កូនៗរបស់គាត់មានជីវភាពមិនធូរធារទេ ក្នុងនោះខ្លះរត់ម៉ូតូឌុបខ្លះលក់នំអាកោជាដើម ទើបម្នាក់ខំអំពាវនាវរកជំនួយពីសប្បុរជនពេលកំពុងធ្វើបុណ្យសពជូនម្តាយនេះ៕ (កោះសន្តិភាព)
